原來，被記得，是一份很深的禮物

前幾日，我去咗一間社區中心帶長者活動。

講起呢個地區，都差唔多十個月冇嚟過。再次踏入呢個地方，感覺有啲熟悉，又有啲陌生。

活動10:00開始，我大約9:40到場，預備物資，等住參加者陸續入嚟。

有啲長者慢慢行入嚟，有啲同身邊朋友傾住偈，有啲一坐低就望住電話。

突然，坐喺第二個位嘅一位婆婆望住我講：

「周姑娘，好耐冇見你喇。」

嗰一刻，我停咗一停，望一望佢。

然後，我認得佢。

佢係上年我差唔多每個月都會去另一間長者中心教香薰同按摩時嘅常客。以前每次開班，佢差唔多都會出現，坐喺度好專心咁聽，仲成日好積極咁發問：

「係咪咁樣呀？」  

「我做得啱唔啱呀？」

原來，時間過咗咁耐，佢仲記得我。

我笑住同婆婆講：

「我哋都真係好耐冇見喇。」

婆婆諗一諗，笑住話：

 「都未夠三年呀，應該一年啫。」

講完，佢輕輕哼起歌嚟：

 「左三年，右三年……」

點知，坐喺隔離嘅兩位婆婆一聽到，竟然好自然咁接住一齊唱落去。

嗰一刻，好似大家心入面某個共同年代，都一齊被打開咗。呢幾句歌詞盛載住一段久別重逢嘅溫暖，將時間、記憶同人情味，唱咗出嚟。

呢個畫面，可能只係活動開始前一個好隨意嘅小插曲；但對我嚟講，卻非常深刻。

表面上，好似只係一份工作，但其實係一段彼此被記住嘅時光—有人曾經認真教佢哋、陪佢哋慢慢學、同佢哋一齊笑。  

人同人之間嘅連結，從來唔一定要日日見面先算存在。有時候，一句「好耐冇見」，已經足夠證明：有啲溫暖，原來一直都被好好收藏喺心入面。  

原來，曾經做過嘅小小事情，曾經喺某啲人嘅生命裏，靜靜留低過一點溫度。

多謝你哋，老友記❤️

KIT 老師的小故事

記低教學路上，一些微小卻有溫度的時刻。